الفاسد ياخدك ع الإرهاب

والمهمل ياخدك ع الاتنين

والظلم حضور فالعدل غياب 

والفاشل ريس "نور العين"! 

والموت بيحش الروح تتحش

المخبر فوق راسك قاعد

وبخمسه جنيه تجيبه توديه

وبعشره بيقتل ميت واحد

وفتحنا كتابنا على التلاميذ

طلعو الحكام قتَله وعواجيز

الدرس الأول: موت يا حمار

الدرس التاني باب النجار

اهمال ودمار وخراب محاصيل

والحلم اتبهدل ف الجرانيل

واعلام العار م الدار للنار

وحكومه بتقتل ف الثوار

وميا ترفع ف الأسعار

وثقافه سخافه ملانه هباب

بتمجّد ف الفرد الواحد

رغم ان الواحد ده بوشين

الفاسد ياخدك ع الإرهاب

والمهمل ياخدك ع الاتنين

والظلم حضور فالعدل غياب 

والفاشل ريّس "نور العين"

ممكن لاتنين يتفقو عليك

دا يكفّر فيك دا يفجّر فيك

دا يبيعلك ميه ف حارة النيل

دا يسد الحارة عشان يلهيك

 دا يقولك نفسي وماليش فيه

 دا يقولك وحدى ومالي شريك

,انت المتبعتر بعيالك

بين فُرن ومستشفى وأتوبيس

وزعيق اليوم بالليل كوابيس

كوابيس الليل أخدو الأحباب

ع المدوَد فاضل كام واحد

بيمأمأ بس الرتبه" مُشين"

الفاسد ياخدك ع الإرهاب

والمهمل ياخدك ع الاتنين

والظلم حضور فالعدل غياب 

والفاشل ريّس "نور العين"