من يومين انتشر بوست بشكل موحد على حسابات وصفحات اللجان  الإلكتروني المؤيدة للسيسي .. البوست كان نصه كالتالي :

 عااااااجل .. لأول مرة في مصر .. الرئيس يأمر وزير المالية بسداد ديون جميع الغارمات وإخراجهن من السجون .. هاشتاج الرئيس الإنسان . 

لما بحثت عن الخبر المزعوم وجدت إنه خبر زائف كالعادة ولما شفت كلمة السيسي مالقتش حاجة من دي خالص والكلام كله كان عبارة عن توجيه للمسؤولين بالعمل على الحد من هذه الظاهرة عن طريق المبادرات ( اللي هي تبرعات من الشعب أو رجال أعمال أو جمعيات خيرية ) ولا أمر وزير المالية ولا اي حاجة وكلام معتاد مكرر إتقال كتير .. وأهو كله كلام . 

الغريبة مش بس إن الخبر زائف .. ده أنا لما راجعت كلمته في عيد الأم لقيته بيسخر كالعادة من المصريين واختصر أزمة الغارمات في بعض عادات الأسر في الأرياف وبسماجه مابتفارقش خلقته 

وضحكته قال : الناس اللي بتشتري غسالتين وتلاجتين وعشر بطاطين وضحك ضحكته المعتاده  وفضل مطول فيها أوي لحد ما الهلافيت اللي قاعدين في القاعة صقفوا على سخريته من المصريين . 

يعني سخر من المصريين وقعد يضحك علينا وكمان اتحول لرئيس إنسان بخبر زائف نشرته مئات الحسابات والصفحات على إنه أمر بتسديد ديون جميع الغارمات واخراجهن من السجون .. وعملوله هاشتاج الرئيس الإنسان 

وقتها افتكرت لما في مرة الناس اشتكت من ارتفاع الأسعار فخرج في كلمته وقال يا خسارة بقى كل اللي شاغلكم ازازة زيت ولا كيس سكر ولا البطاطس بقت بكام ؟ ولا لما تم تداول كام فيديو لطبقة معينة من المصريين وهما بينزلوا من عربياتهم ويرقصوا جنبها وقال لوزير البترول بنفس الضحكة السئيلة السمجه زود البنزين ماتخافش . وغيرها وغيرها وكأنه لا يعرف المصريين عايشين ازاي ولا فاهم أنه إزازة الزيت وكيس السكر وكيلو البطاطس هما أهم مايشغلهم .. أو كأن المصريين كلهم راكبين عربيات بالملايين وبيعملوا كيكي .

لو ركزتم في ردود السيسي على شكوى المصريين حتحس في ابتسامته شماته وفرحه وكأنه بيحقق هدف معين ونجح فيه بإمتياز .. هل الهدف هو إذلال المصريين وإهانتهم في بلدهم اللي هو وجنرالاته متنغنغين في نعيمها ؟؟ ولا افقارها وبيع مقدراتها وثرواتها وإضعاف قوتها وإنها تبقى دولة تابعه لدول عمرها عشرات السنين ؟؟ ولا جميع ماسبق ذكره ؟