مسحراتي في إيدي طبله وكـتاب 

في اسكندريه بانادي ع الأحـبـاب

ميـن اللـي قـال البُـعـد بيـنـسّــــي 

ياعم بيرم يا تونسي 

أنا جاي أمسّي.. ما تواربش الباب  

فات الزمان اللي كان 

وكإنها امبارح 

والأرض عاليه بنخلـهــا الطـــارح 

والعقل سارح في هوى المحبوب 

والدنيا ساعة غروب 

والشمس راخيه الشعور 

على شواشى النخيل 

عدت ضفاف النيـل.. 

ونازله جنب الفنــاره 

بتشد طرحتها اللي شابك ديلها فى الحاره 

. 

والقهوجيـه بيكنسـوا ويـرشــوا 

وبيفـردوا المشـاريب وبيرصّـوا 

نسمة عصاري في سنة خمسين 

. 

والعاشِقين سألوا كئوسَ الطِّلى 

هل لامَسَتْ فاها 

والتُرْمايـات في الرمل متعطله 

من وشها لقفاها 

والعربجيه بيشتكوا مْن الغَـــلا 

وينادوا أهل الوجاهه 

ومين حيسمع نداهـا 

إلا قلب أمين 

يا عـم بيــرم كنـت غايـب فيـن؟ 

غَمَــز بعينــه مـن السمـا للميـنـــا 

وقاللي يا ابني العمر مش بَعْزَقَه 

أنا قلت يابا العمر مش تحويشه 

ضحك.. وشد الشيشه 

ودار ما بينّا الكلام 

تـلاتين سـنه قُـدام 

وعِلِــي مَـزاج القَـفْـش والتريقه 

والضحك والهقهقه 

وقاللي: كفك.. قوم نسحّـر بقى 

رمضان كريم