رقم القضية بيشبه العنوان

بيدل على إنك في الوطن متهان

رقم القضية مافيهوش رقم سبعة

ولا رقم تسعة

ولا حروف اسمك

ولا أي حاجة كمان

رقم القضية عبارة عن مكان فاضي

محطوط عشان قاضي

شغال عليك سجان

ما عرفشي ليه 

صورتك خدتني 

فجأة على خوانة

نظرة عيونك للبشر بالفرح مليانة

فيه بشر بتزرع في بيوتها الحزن

وفيه بشر بتزرع ورد في الزنزانة

وانت شبه البنفسج 

في كل لحظة بتبهج

كل الوشوش 

حتى ولو تعبانة

مصطفى الأعصر

كلام عابدين عنك كلام يتحفر بالنقش

صديق العمر ما يفارقش صديق العمر

إلا بافتراق النعش

الأولة مصطفى

أكتب كلام عنك لاجل القلوب تهدا

والتانية مصطفى

وادعي وابسمل في الركعة والسجدة

والتالتة مصطفى

فيه ناس بننسى اسمها

وناس مهما تغيب

جوه القلوب خالدة

طولت حبة

حبة شوية

رقم جلوسي

ع الدكة دي

طفيت فانوسي

من نور عينيا

كبرت فعلا

والا هزار

بقيت أزعق

زي الكبار

واضحك وابكي

وابكي واضحك

واضحك واشكي

وافرح في جرحك

نسيت طفولتي

كده جوه حارتي

وبقيت أقول

ع الحيط جدار

مصطفى الاعصر

كان ليه مقام

وراية خضرا

نادهة الزحام

وناس تيجيلوا

من شبراخيت

وناس تقول

عليه إمام

من صفو قلبه

عملوله جانبه

مولد بيبدأ

من الست عيشة

لحد اما يوصل

أم الغلام

يا اعصر حيطانك

ما تحوشنا عنك

عادل وقادر 

يفك سجنك

يا رب زي 

موسى ناديته

رجع صاحبنا

تاني لبيته

من قدك انت

ع الخلق أرحم

رمضان كريم 

بس انت أكرم