تكبير الخط تصغير الخط

أصدقائي ومعارفي القدامي يتذكرون لي مقولة كنت دائما" ماارددها وهي ان ... اليسار جميل بدون  شك بس اليساريين نفسهم ولاد ستين كلب ... وما ينطبق علي اليسار ينطبق علي اليمين كذلك والليبرالية حاجة آخر جمال ولوز اللوز بس الليبراليين نفسهم حاجة آخر فاشست ... شجرة الليبرالية المصرية ثورة تسعتاشر ١٩١٩ أنتجت لنا شوية رجالة لوز العنب تقريبا لايعرفوا عن الليبرالية الا الوصول لكرسي الوزارة أو النيابة ... النقراشي باشا والنحاس باشا وعلي ماهر باشا ومكرم عبيد باشا ... الثلاثينات والدنيا آخر ليبرالية والنحاس باشا يوقع معاهدة ٣٦ ومكرم عبيد يقدم طلب إحاطة في البرلمان عن بالطو وفورير السيدة زينب الوكيل حرم النحاس ومن اين لك هذا وفورير بجلد الثعلب يساوي كام والنحاس يرد عليه .. ليبرالية بقي وكده ... والإخوان يدخلوا علي الخط ومقولة حسن البنا المشهورة اذا كان الشعب مع النحاس فأن الله مع الملك وهوب الحرب العالمية تسخن والانجليز يطالبوا بزيادة إعداد الجيش المصري وتدخل دفعة جديدة ممن لهم واسطة من ابناء العمال والفلاحين الي الكلية الحربية ... تسخن الحرب اكتر وقوات هتلر تصل العلمين وهتلر يعلن عن تعليق روؤس بديعة مصابين والعقاد علي ابواب القاهرة عند دخوله ... الملك فاروق وبسبب انه متغاظ من احتقار الإنجليز له قرر طرد الاحتلال الانجليزي واستبداله بأحتلال الماني .. ليبرالي ... ليبرالي مفيش كلام .. وفتح خطوط اتصال مع الألمان ... الإنجليز فاهمين وعارفين فاروق كويس هوب قال لك لازم نجيب النحاس باشا رئيس وزراا عشان الجبهة الداخلية وكده .. فاروق رفض فراح له السفير الانجليزي وإهانه في قصره ودخل النحاس باشا رئاسة الوزراء علي دبابة بريطانية غصبا" عن عين ملك البلاد المفدى فاروق بن فؤاد ... شوفت الليبرالية يا جدع... الملك فاروق برضه مايأسش وانشئ تنظيم حديدي مسلح صغنتت كده يتصل به بالألمان  وفي نفس الوقت يقتل معارضيه .. قال لك نقتل النحاس بس اترعب من ردود الأفعال وقرر قتل وقطع يد النحاس ورجل النحاس عند الإنجليز امين عثمان صاحب مقولة ... علاقة مصر بأنجلترا زواج كاثوليكي ... انور السادات الظابط الصغير في الجيش وقف ناضورجي لغاية واد مدني ثوررجي اسمه محمد ابراهيم كامل ما يخلص علي الخاين امين عثمان ... شوفتوش الليبرالية ... رئيس الوزراا الجديد احمد ماهر باشا بتاع السعديين المنشق مع النقراشي علي الوفد اسقط حسن البنا في الانتخابات البرلمانية في مسقط رأسه في الاسماعلية ... الإخوان يسكتوا ابدا ... يادوبك احمد ماهر باشا يعلن عن رغبته دخول الحرب مع الحلفاء لتقسيم الغنائم وخصوصا ان البوادر تدل ان انجلترا منتصرة لا محالة ويطلق الإخوان بالاتفاق مع الملك حملة علي الرجل تنتهي بتكليف شاب عضو في الحزب الوطني وعضو في الاخوان لاغتياله .. و الواد ماكدبش خبر واغتال احمد ماهر باشا ... طب هو ينفع يبقي عضو في الحزب الوطني وفي الإخوان في نفس ذات الوقت ... ايواا عادي الدنيا آخر ليبرالية كان الناشط السياسي وقتها يدخل أكثر من تنظيم في وقت واحد وعلي رأي الأخت يسرا ... ياختشي كده ينفع وكده ينفع والدليل ان عبد الناصر وخالد محي الدين كانوا بيجتمعوا مع تنظيم حدتو الشيوعي في المنيل العصر ويروحوا مصر العتيقة يصلوا المغرب وراا حسن البنا ويدخلهم أوضة ضلمة بعد الصلاة يحلفوا فيها قسم الولاء للجماعة ... وجمعية و دايرة والدنيا آخر ليبرالية وزبادي في الخلاط ...

بعدها تم تكليف النقراشي باشا الوفدي المنشق زعيم حزب السعديين بالوزارة والراجل لأنه يؤمن بالليبرالية الحقيقية ولأنه كان مدرس ابتدائي فكان عنده حساسية من العيال طلبة الجامعة وفي اول مظاهرة كبيرة يفتح كوبري عباس ويسقط الطلبة في النيل بين غريق ومصاب وتتم اقالته... ليبرالي .. ليبرالي يعني ... تقوم حرب فلسطين والملك فاروق يقرر تحرير فلسطين من اليهود ويرسل الجيش المصري الي هناك ... الإخوان بقي يتطوعوا مع الجيش ... لا ابدا ... يشكلوا هم بنفسهم بذات نفسهم سرايا وكتائب ويروحوا يحاربوا في فلسطين ... فرح العمدة والكل بيضرب نار ... تخلص الحرب وتسقط فلسطين ... ويرجع النقراشي تاني يبقي رئيس وزراا والمرة ديه النقراشي مغلول ومتغاظ من الاخوان ومن حسن البنا شخصيا ... النقراشي كان مدرس عربي ابتدائي وحسن البنا كان مدرس خط ابتدائي برضه وتحس كده ان كان بينهم حقد علي حصص إضافية أو دروس خصوصية ... هوب النقراشي يعلن حل الجماعة ومصادرة أموالها وأغلاق مقراتها والقبض علي أعضائها... وفي عز موجة غضب يتمتم حسن البنا ويقول .. وبعدين معاك يانقراشي امتي نخلص منك بقي ... يسمع الكلمتين دوول عبد الرحمن السندي قائد الحرس الخاص للإخوان ( التنظيم العسكري للإخوان ) ايواا سعاتك كان كل حزب او جماعة لهم بلطجية تحت مسمي عمليات عسكرية وأمنية للجماعة او الحزب وبالمرة ضرب اتنين عساكر انجليز سكاري في عماد الدين وكده ... فعبد الرحمن السندي ده في الاغتيالات كان شاطر وجهبذ في تجنيد وتدريب وتجهيز فرق الاغتيالات ... المهم السندي صعب عليه حيرة وارتباك مرشده وتشتت إخوانه اوووم راح مكلف واد لسه طالب في كلية الطب بقتل النقراشي .. الواد  ماكدبش خبر .. قلع البالطو الأبيض ولبس بدلة ظابط شرطة ولأن النقراشي كان رئيس وزراا ووزير داخلية فالواد انتظره علي باب وزارة الداخلية وضربه ثلاث رصاصات أودت بحياته ... الواد ده اتقبض عليه والبوليس السياسي تقريبا نفخه انه يعترف بعضويته لأي جماعة أو حزب والواد متماسك ولا راضي يعترف لغاية ما وصل له ان حسن البنا قال من قتلوا النقراشي ليسوا إخوان ولا مسلمين  هنا الواد قالك هو انا هشيل الليلة لوحدي واعترف علي الاخوان ... الملك فاروق وصله الخبر أتضايق جدا وخصوصا بقي ان شباب حزب النقراشي السعديين الأحرار كانوا بيهتفوا العين بالعين والسن بالسن النقراشي بحسن البنا ... ارسل الملك ابراهيم عبد الهادي الي ارملة النقراشي يعزيها رفضت العزا وقالت له ... ياللا يا بلد مفيهاش راجل .. مفيش عزاا اللي بعد متاخدوا تار النقراشي ... ابراهيم عبد الهادي وصل الكلمتين لفاروق

ابراهيم عبد الهادي وصل الكلمتين لفاروق وفاروق لأنه شخصية دراماتيكية قرر قتل حسن البنا في توقيت دراماتيكي وفي نفس يوم أربعين النقراشي ويوم عيد ميلاد الملك يقرر يقتل حسن البنا في عملية سماها فاروق الكونت دي مونت كريستو ... شوفتوا ام الليبرالية ياجووودعان وفي يوم ١١ فبراير وعلي سلم جمعية الشبان المسلمين يطلق مخبر ثلاث طلقات علي حسن البنا ويسقط ويظل ساعتين حتي وصلت سيارة الاسعاف وتنقله حي الي القصر العيني ويترك ينزف خمس ساعات حتي الموت حسب أوامر فاروق الليبرالي ... ويوم ١٤ فبراير يصل الخبر الي سيد قطب في أمريكا حيث كان يدرس السيناريو والكتابة السينمائية وسيد قطب وجد الأمريكان في اليوم ده في سعادة وحب ودباديب وقلوب حمرا وبيرة وشمبانيا وآخر مليطه قالك بس ده الأمريكان بيحتفلوا بموت حسن البنا ... ياعم ده الفلانتين ... يا باشا ده عيد سنوي وهو رأسه والف سيف ان الأمريكان بيحتفلوا بموت حسن البنا ... الله يرحمه كان فيلسوف ومفكر وواعي اووي

الملك يرجع النحاس باشا رئيس وزراا ويحدث حريق القاهرة ... اللغز ... أكثر من ثمانين سنة ومحدش في مصر او في الإقليم او العالم يعرف مين وليه وازاي حرقت القاهرة ... وتقوم حركة الجيش المباركة ... المباركة ديه مش من عندياتي ده وصف وتوصيف سيد قطب لها ودخل الإخوان في صلب ثورة يوليو لدرجة ان سيد قطب سخصيا" كان بيحضر اجتماعات مجلس قيادة الثورة وهوب شوية عمال غلابه في كفر الدوار عملوا مظاهرة عمالية قدام مصنعهم ونزل البوليس وحد من جهة العمال ضرب نار مات فيها عسكري من البوليس وكتب سيد قطب عن تنظيم كفر الدوار الشيوعي وان الحركة المباركة لازمن ولابد تضرب بيد من حديد علي التنظيم الشيوعي ده وسخن الشباب الصغير بتوع مجلس قيادة الثورة ضد العمال البسطاء ( ياعم اهدي ده الزمن دوار ) وتشكلت محاكمة عسكرية برئاسة السادات وحسين الشافعي وأعدموا خميس والبقري من قيادات العمال .. قررت الحركة المباركة (كما كان يسميها سيد قطب ) التخلص من نجيب وتصعيد عبد الناصر ... قشطة ... حلو عبد الناصر ... نقدم له بقي طلباتنا كأخوان ونوعية وعدد الوزراا .. فضل عبد الناصر يماطل وفي الاخر قدم لهم وزارتين بس .. اتقمصوا ... وعملوا حادثة المنشية .. وليبقي كلا في مكانه .. وقبض عليهم عبد الناصر وبرضه اتوجهوا لمحاكمة عسكرية ( زي خميس والبقري ) وتأتي للحظة الفارقة تخص الليبرالية المصرية وهي حرب ٥٦ .. الإنجليز والفرنسيين والإسرائيليين احتلوا سينا وداخلين علي مدن القناة وفي نفس ذات اللحظة كان فؤاد باشا سراج الدين بيحضر ويجمع لحكومة منفي في قبرص ومنها خرجت الإذاعة لمهاجمة النظام في مصر ... طب الإخوان يسكتوا ... ابدا ... قالوا لفؤاد باشا ... استني يابشبوش احنا هنروح نجيب محمد نجيب من محل اقامته ونعينه رئيس كده وكده يعني ونبقي أسرة واحدة مع بعضيشينا ...

ومع انسحاب قوي العدوان الثلاثي تنسحب وتتقهقر الليبرالية المصرية ويبدأ عهد الرئيس الواحد الشمولي الديكتاتور عبدالناصر ... الليبرالية فينا بس احنا ربونا هادينا